وثائقى skol
كلمة و ثائقى فى اللغة معناها حاجة مموثقة و فى الاصطلاح معناها تصوير عدد من اللقطات الفوتوغرافية لبعض المناظر المؤثرة و المميزة مع اضافة خلفية صوتية او لحن غنائى مناسب بس ما غنية هابطة !!!
و كلمة skol فى اللغة معناها مدرسة و فى الاصطلاح معناها مكان بتلاقوا فيه طلاب العلم عشان يدرسوا و يتعلموا لكن فى واحدين بجو عشان " اترمتلوا " وبى مناسبة اترمتلوا دى الجماعة ديل كتروا الايامات دى وعلى الفكرة الرمتلة دى ما حاجة كعبة دا نشاط اضافى مع الدراسة يعنى حاجة زى have fun كدا .
هسع تقولوا الزول دا كضاب الكلمتين ديل ما معناهم كدا وواحدين بقولوا الزول دا ما عندو موضوع داير يمسك بينا زمن وواحدين اقولوا يااااااخ افتح . دايرين الحقيقة بالجد هم ما معناهم كدا لا لغة لا اصطلاحا . ومن غير ما " اكضب " او " امسك بيكم زمن " او " افتح " الحقيقة انو انا كنت داير مدخل ادخل بيه للموضوع و لقيتوا .
المهم skol دى من الكليات فى جامعة الخرطوم كانوا الناس بقولوا عنها اكتر كلية اجتماعية لدرجة انو الطلبة الفيها كلهم حافظين " وشوش " بعض وماف زول يقول لى ما عارف وشوش يعنى شنو . ياخ انا لما جيت برلوم لقيت " شارع المين بتاع سكول " كلو بعاين لى لما اتخلعتا وقلت يا ربى انا فنان مشهور وانا ما عارف " دا على اساس انو الناس الايامات دى بقو من ما يشوفو ليهم فنان حايم انشالله فى شاشة بلازما يقعدوا يعاينوا ليهو وهم فاتحين خشمم ما عارف علاقة العين بالخشم شنو " ياخ بلا خشم بلا عين و نرجع لى موضوعنا الاساسى .
انا ما عارف المقولة دى اتغيرت ولا لأ لكن العارفو انو بالجد الاجتماعيات دى قلت كتييييييير و بقت ما زى زمان وعلى فكرة دا ما كلامى انا دى حاجة شايفنها الناس فى skol و عايشنها .
بى صراحة انا ما عارف الحصل شنو ما هو يا اما ناس skol ديل تقو او لقو مش دا الكلام البقولوهو فى الحالات الزى دى ؟
على اى حال لسة فى ناس فى skol محتفظين باجتماعياتهم لكن على نطاق الـ Groups و الشلليات و مؤخرا الاصحاب " الانتيخ " و ديل كلهم كتاااار ما حبة وبى مناسبة كتار دى داير اهنىء البرالمة بالعام الدراسى الجامعى الاول و بقول ليهم عام رياضياتى سعيد " بهظر معاكم ساى ما تهرشوا " و بقول ليكم يا برالمة اجتماعيات فى skol يعنى علاقة برالمة بى سناير وعلاقة سناير بى برالمة و علاقة سناير بى سناير فى " بعض اوقات الزعل " و علاقة برالمة بى برالمة خصوصا فى اول اسبوع قول اول شهر .
قبل كم سنة ناس skol فى الخمسة مستويات من اولى لى خامسة كانوا اجتماعيات الف و البرالمة بعرفوا السناير " ما عشان اى غرض " و السناير بعرفوا البرالمة "ما عشان برلومة حلوة " لكن عشان يكسروا كل الحواجز الموجودة و يقدروا يتعاملو مع بعض فى جميع المناسبات و النشاطات بكل انواعها كان اكاديمية كان حفل استقبال برالمة كان فى اسبوع ثقافى كان فى دورى مستويات بتاع كورة كان فى دورى الجامعة بتاع الكورة او السلة ( يا برالمة ناس skol ديل ابطال الكورة و السلة فى الجامعة من كم سنة كدا يعنى ارفع راسك انت skoly ) كان فى القراية و الشرح كان فى سمنارات و ندوات علمية كان فى التخريج ( بالمناسبة قالوا التخريج قرب ) .
ناس skol ديل كلهم برالمة على سناير " و اساتذة فى بعض الاحيان " كانوا كلهم يد واحدة وكلهم او بعضهم يعنى ما كلهم كلهم بعملوا النشاطات مع بعض و عشان كدا بتطلع فى احل شكل و الناس بتنبسط و بتقضى وقت جميل . لكم من اليوم القلت فيه الاجتماعيات ( من كم سنة كدا مضو ) اى حاجة بقت تكون ضاااااربة بامارة الاسبوع السخافى قصدى الثقافى بتاع السنة الفاتت ( معليش يا ناس الرابطة الفاتت الانا كنت واحد منهم ) لكن دل الكلام الكان بقولهو الناس الما عارفين حاجة .
انا ما داير الوم زول لكن الداير اقولو او الناس ترجع للاجتماعيات زى زمان يعنى تانى السنير اعرف البرلوم و البرلوم اعرف السنير ( عارف كلامى ما عاجبكم و قعدتو تضحكو و تطنطنوا ) ااااااااااى اتعرفوا على بعض ما ضرورى كلكم ياخ انشالله عشركم المهم العلاقات تكون كويسة و بتعرفوا بعض عشان اى حاجة ترجع حلوة ونشاطات سنتكم الجديدة تكون زااااااابطة وتكون برامج الف .
اتمنى انو نشوف skol امتر كلية اجتماعية زى ما كان بتقال ويمكن يكون لى يوم الليلة بتقال و الله يوفقكم كلكم .
ملحوظة : كلمة برالمة التى وردت فى الموضوع دا ما معناها سنة اولى بس لانو بقولو البرلوم يظل برلوم حتى يتخرج سنيرو . ولما يقولو ليك برلوم دى ما حاجة كعبة او شينة ما سمعتو بى البرلوم مول ؟
محمد عبد الرحمن عبد الجليل
ليست هناك تعليقات:
إرسال تعليق