سلام يا شباب كل سنة وانتو طيبين بمناسبة العيد داك لو بتتتذكرو وانشاء الله العام الدراسى حيكون باسطة … بس خلو العطلة … شفتو النصايح دى كيف نظام الود عاطل وكدا …معليش بقصد خريج وكدا
المهم السنة الجاية كدا انشاء الله يجيكم لوترى ….. زى العبد لله كدا …. طبعاً باعتبار ما سيكون .
والله ياجماعة الزول قدر ما يقول يكتب حاجة يشوف الكيبورد خمسة …. خمسة والزنب ماز.. ولا اقول ليك حاجة خليها .
طبعا ياجماعة نحن سودانيين …اللهم لانسالك رد القضاء…. حياتنا كلها ملخبطة من البيت وانت ماشى لحدى الوزارة …. شارع السجانة بودى الحرية….. لاعبنا بتعلم الكورة كبير…. وهيثم مصطفى سيدا زاتو ما بعرف بشوت … دى معقولة كابتن الهلال والسودان وسيدا وسفير النوايا الحسنة وهلم جرا….
لعيبة الهلال ديل شالو الكاس عديل وبدل كورة مازيمبى بقوا يفكرو فى كورة برشلونة … معقولة بس .. وقالو علاء الدين فييرا…شوف فييرا دى….اتشاكل مع سيف مساوى وحلف طلاق ميسى يقفلو هو … وصلاح ادريس رسل ناس يتابعو تمارين برشلونة … والكاس يختو فى شنو …. معقولة بس!.. نمشى نعمل لينا بترينة من قزاز عشان نخت فيها الكاس( اصلو دا كاس ولا باسطة) … عشان ما يتوسخ … طيب كان اتوسخ لازم نعين زول ينضفو كل يوم .. طيب الزول العيناهو دا لو طلع مريخابى وقام سرق الكاس …. خلاص نعمل معاينات عشان نختار لينا زول بى عناية … وبعدين حنعمل حرص للبترينة …. انت قايلة بترينة هينة دى بتاعت كاس دورى ابطال افريقيا ولا اقول ليك نعمل بترينتين عشان كاس العالم للاندية ….خلاص انحن نعمل لينا متحف كبير للانجازات بتاعتنا وبالمرة نخت فيهو ميداليات كاكى واسماعيل الاولمبية .
غايتو احلام فى احلام ولى يوم القيامة حنكون بنحلم بس وما بنعمل حاجة عشان احلامنا تتحقق … نجيب المحترفين الجاهزين ناس وارقو الماسورة عشان يجيبو لينا كاس والغريبة المحترف كان بقى كاكا زاتو بكرة بتلقاهو فى الغرز وعن ستات الشاى ومحل الشيشة …. وكورتو لو كانت بالمسة يبقى اليق من ملاح الويكة وهاك يا جبيد وهاك ياقلب … والجماهير تكوك ووووك وروروك … وزى ما قالو البصلة المعفنة بتعفن الشوال ..طيب الشوال المعفن بعمل شنو للبصلة .بالعقل كدا هسى لو فى زول ما قرا الاساس والثانوى يجى يعمل فى الجامعة شنو …بس ديل لعيبتنا … لابراعم لاناشئين من الدافورى للدافورى برضو .
والمساكين الناس البدفعو قروشم فى الاستاد وفى كرت اى ار تى والله انا حارقانى قروش الكرت لى هسه … والله الناس ديل جابو لينا عقدة عديل .
هسى عليك الله شوف شفع غانا ديل خرتو اى شئ فى كاس العالم للشباب .. يعنى بى لغة البلى جوز ما خسار … الكاس واحسن لاعب والهداف ….و انحنا رئيسنا عمل دورة سيكافا للناشئين يعنى بطولة الفقراء والمفلسين … الكلام دا هنا فى السودان … ناس منتخبنا زورو اعمار اللاعبين .. معقولة بس …..
السمحة علاء الدين يوسف والمعز قالو ماشايفين الكورة … شفتو الكلام دا كيف .. دى يعنى شنو يكون جاكم ضعف نظر فى نص الكورة, بس فالحين تشوفو القروش … دايرين تقولو ناس مازمبى عملو ليكم عمل … هسى عليكم الله فى فريق سودانى داير ليهو عمل, ما معروفين,يعنى دى ماجديدة الخمسة اخدناها والاربعة اخدناها والسبعة زاتا اخدناها … عمل شنو ياخ عليك الله افتح ….
غايتو انا بنصح الناس انها تبتعد عن الكورة بتاعتنا دى ولو لقيت ليك كورة سودانية شغالة ,من قبل ما تعرف دى كورة منو ,تستعيز بالله وتتخارج طوالى ولو جريت بكون افضل .. والكلام دا حفاظاً على حياتك ما اكتر… غايتو انحنا الله يشفينا ساى.
……..احلام زلوط…… …
ياجماعة انحنا بعد نجيب الكاس دا ناس المريخ ديل تانى يقولو شنو
…كاسات محمولة جواً .. برضو عندنا كاس محمول جاى من الامارات … بس مالاقين لينا مدافع يمسك ابراهيموفتش ….. ميسى طبعاً ماسكو علاء الدين فييرا .
ليست هناك تعليقات:
إرسال تعليق