الاغنية السودانية ... لماذا ؟؟!
أبدا ما هنت يا سوداننا يوما علينا
بالذي أصبح شمسا في يدينا
وغناء عاطرا تعدو به الريح
فتختال الهوينى يا بلادي
من كل قلب يا بلادي
الو ...الو... انا شيرين من الرياض
المزيعة: مرحبا شيرين كيفك
شيرين : والله بطلب اغنية لى تمورة وبهديها لى ...
المزيعة: طيب نسمع اغنية لى تامر حسنى ونجى بعدين نسمع واحدة لى ايهاب توفيق..
****
قبل كم أسبوع كده مشيت لى حفلة وطبعا زى ما بيقول طه سليمان :
الزفة مصرية
اللبسة هندية
الرقصة حبشية
يا حليل الهوية ياعوض دكام
السيرة دلوكة والعريس قدام
وبين الفاصل والفاصل كان عبارة برنامج" امانى واغانى" ولا اغنية سودانية بالغلط.
السؤال المهم الدايرين نسالو ونتناقش فيهو ليه.............؟
كدى أول حاجه نوريكم نتائج دراسة علمتو (طلعت) .
100% من البنات في الكلية بسمعو اغانى عربية
88% من الأولاد في الكلية بسمعو اغانى عربية
5% من البنات في الكلية بسمعو اغانى سودانية
30% من الأولاد في الكلية بسمعو اغانى سودانية
يعنى يا جماعة بالعربي كده .... ولا اقول ليكم بالسوداني كده الناس دى مادايره مع الاغانى السودانية عديل .
المشكلة مافى الناس البتسمع اغانى عربية ,المشكلة في الناس الما بتسمع سودانى
ونسأل تانى لى شنو....؟
ونسأل سؤال تانى ,أخر مره لبست\لبستى فيها جلابية\توب متين ؟
دى واحده من الأسباب انو بعدنا عن ثقافتنا السودانية عشان كده فقدنا البوصلة من غربي لى مصري لى لبناني لى عراقي حتى في الاغانى "بوصلة دى سمحة مش كده".
سؤال تانى ..اقصد رابع هل المصريين و اللبنانيين بسمعو اغانى سودانية.... وبرضو ليه...؟
كدى يا جماعة نجيب من الأخر كده ونشوف السبب شنو,
أول حاجة الديجيتال لانو فيهو خورتمية قناة بتاعت اغانى ,يعنى الواحد مابتعب انو يفتش اغانى أو يجيب ليهو شريط طوالى يشيل الريموت وهاك يا ميلودى وياروتانا مع انو فى قناة سودانية بتاعت اغانى "هارمونى" لاكين كليب من كليب بفرق.
يعنى فى ناس بسمعوا اغانى عربية ...اقصد بحضروا اغانى عربية ناس نانسى ومروة ما عشان الغنية ولكن لشى أخر فى نفس يعقوب.
فى ناس طوالى يقولو ليك لا والله ما كل الفيديو كليبات كده . كلامكم صاح والفيديو كليب بزيد تفاعلك مع الأغنية لانو يضيف ليك حاسة جديدة وهى النظر,لاكين يرضو بيحرمك من انك تتخيل ومعروف انو الرواية أفضل من الفلم .
طبعا نحن بنتكلم عن الفيديو كليب ما عن فنان بغنى.
كدى نتجاوز الفيديو كليب لى نقطة تانية .
السبب التانى الاغتراب وتاثيره على أبناء المغتربين ,لانو الاغتراب يؤثر على ثقافتم الموسيقية .كدى اذكر عندك صحبك شهادة عربية بيسمع سودانى ...الله اعلم.....وديل معزورين.
تعال بعد دا نشوف السواد الاعظم ديل مشكلتم شنو
فى ناس بقولوا (( انو الأغنية السودانية ما معبرة وانو الأغنية العربية بتهبش فيهم أوتار حساسة ,تسالو تقول ليهو زى شنو يقول ليك اغانى الحب وما ادراك ما كاظم الساهر وايهاب توفيق وتموره و.....و...الخ.))
وطبعا ديل اكيد ما سمعوا اغانى سودانية عشان كده بيقولو الكلام ده ,لانو ّول سمع سوداني مستحيل يقول كده.
طبعا ياجماعة لو نظرنا لى التركيبة النفسية للإنسان السوداني بنلقاهو إنسان مكبوت يعنى ما بعبر ولو عبر ذاتو بعير بى فوق فوق عشان كده الناس دى بتهرب وتعيش فى الاغنية العربية. وبعد ده كلو الناس ديل ماناقشين اى حاجة لانو الاغانى السودانية دى فيها كترة حب وغزل وبكى وجرس ورقاد بس الناس ديل ما شايفنها واديكم أمثلة بسيطة.
***
سوات العاصفة فى ساق الشتيل الني
وفعل السيل وكت يتحدر يكسح مايفضل شي
دا كان حبك وكت حسيتو شفت الدنيا دارت بى
***
وكت شفتك شعرت الرعشة من صوف راسي لى كرعى
ومن الساعة ديك يا سمحة ولع فينى جمر الكي
كتمت الريده ما شافوها ناس الحي
وقلت الجنة عاد إنشاء الله ما يقسن دروبا على
شوفتو الحب دى كيف اديكم مثال تانى :
مع السلامة..مع السلامة
وما تنسي لي ترسلي..
يسعدني إنك تذكريني
وعني دايماً تسألي
******
إتذكري الريدة الكتبنا حروفا بي أجمل وفا
وأطري الحنان المني ليك ساعة جفا وساعة صفا
وإتذكري الريدة الزمان بيناتنا أطري المعرفة
******
بوصيك أنا لو أنتبهتي في يوم لي ذاتك
وبحثتي عن الما أنقضى من أمنياتك
ولقيتي في جواكى أوصافي وصفاتك
أنا لسة ما سكت النغم في قلبي من فيض أغنياتك
******
علي أي حال إنشاء الله ما آخر وداع
عشم اللقاء بيك ما انقضى لو مستطاع
أصلو الحياة بين الأمل والشوق صراع
لكني زورق حبي ليك يا غالية ما داير شراع
مع السلامة مع السلامة..
ما مع السلامة اديكم كمان شوية غزل فى العيون عشان مايقولو مامعبر:
عابر طريق فايت نام فى العيون وارتاح
عيون حبيبي ديار تستقبل السواح
بشوشة طول اليوم سرحانة فى الأحلام
الأسود النشوان زورق من الألحان
فوق البحار البيض سابح بلا ربان
مكتوبة فوق سطحه قصة حياة إنسان
أجمل عيون عندك يا أجمل الحلوين
نجدة غريب ومنار برجع التايهين
تايه أنا وحيران رجعنى للعينين
وهاكم واحدة تانى فى العيون :
عيونك زى سحابة صيف تجافى بلاد وتسقى بلاد
وزى فرحا يشيل منى الشقا ويزداد
وزى كلمات بتتاوه تتوه لمن يجى الميعاد
وزى عيدا غشانى وفات وعاد عم البلد اعياد
وزى رفح البعيد العاد
وزى وطنا وقت اشتاقلو برحل ليهو من غير زاد
بدون عينيك بصبح زول بدون زكرى وبدون ميلاد
ولو قعدنا نكتب لى بكره ماحنخلص لاكين اقول ليكم حاجة فى النهاية أذا انت ما قدرت تعبر عن ألجواك فى إطار المجتمع والثقافة حقتك ولقيت نفسك فى مجتمع تانى وثقافة تانية فانت اكيد حتعانى من مشكلة كبيرة "دى شنو الكلام الكبار الانا بقول فيهو الليلة ده".
المشكلة مش انو الاغنية السودانية ما معبرة ...ممكن امعطكم شويه.
اساسا الاغانى العربية بتعتمد على السلم السباعى: دو ري مي فا صول لا سي ,اما السودانية فسلمها خماسى : دو ري مي صول لا.يعنى فى فرق فى السلالم الموسيقية عشان كده الزول البسمع اغانى عربية كتير اذنه بتتعود على السلم السباعى فلمن يسمع اغنية سودانية حيشوف الاغنية ضاربة واللحن ما كويس والكلمات ما معبرة والأغنية تقيلة.عشان كدة لازم تاخد فترة فى الأول عشان تتعود على السلم الخماسى.
انتو ياجماعة عارفين انو أم كلثوم غنت للهادى ادم "اغدا القاك",
وبرضو سمعتو" بالشمندورة و نعناع الجنينة و وسط الدايرة و الشعب حبيبى وشريانى" المجدع بيهم محمد منير دى ما اغانى سودانية .
يعنى هم ما أحسن مننا بس الناس تكون عندها شوية ثقة فى نفسها وتخلى الخلعة الخاشة فيها دى وبلا اغانى عربية بلا بوس الواوا... بلا بص... بص ونتناقش فى الاغانى السودانية الاغنية الشبابية ام الاغنية الشعبية ام اغانى الحقيبة ولا الاغانى الهابطةوما ادراك ما الربع ونجاة غرزة والما بتسمع سوداني انشاءءءءءءءءءالله مايعرسوها والمزوجة انشاء الله تتطلق.
Nubian Boy
ليست هناك تعليقات:
إرسال تعليق