مذكرات بت ممغوسة من البنات
السنة دي اول سنة ادخل في الناس "مجتمع الجامعة " واتعرف بيهم عن قرب- نسبة لظروف قاهرة اجبرتني على ذلك - هذه الظروف خلتني اتعامل مع بنات و اولاد كتار من مختلف البيئات واعرف كتير من صفات الجنسين ما كنت عارفاها.
زمان كان رائي انو مجتمع الأولاد مجتمع قاتل، وإنهم دايما بيظهروا لينا- البنات -عكس ما يبطنوا.. وافكارهم دايما شريرة وما في حاجة كويسة وما في خير بيعملوه الا تجي من وراه مصيبة.
معليش ...
انا بعتذر عن الكلام القلتو ده .. ماعشان هو ما صاح .. لأ هو صاح 100% لكن اكتشفت – مؤخرا - انو مجتمع البنات اردء.
القصص الأنا حقولها دي ما من صنع خيالي الخصب .. هي مواقف مريت بها ... وللأسف الشديد بتحصل مع كتار غيري ... وبتتكرر ..
السؤال: هل البنات في الكلية دي والأنا بعرفهم عينة عشوائية تمثل مجتمع الفتيات احسن تمثيل.. ولا انا الكج وحظي زي وشي الخلاني اعرف بس الاشكال دي؟؟!!!
أنا حأحكي وانتو احكموا ......
الموقف الاول
من الصباح تلاقيك الوحدة اخر سلام وبوس و ونسة ... نهاية اليوم تلاقيك صارة وبتحدر .. يا بت الناس مالك؟!!! اسال بقية الشلة،ياجماعة فلانة دي شكلا زعلانة مني عارفين لي؟ بردوا: انت قبيل ما كنت خالطة فلان زولا.. -خالطة؟!!!!!!ياجماعة هو الجاني وسلم علي..السلام سنة..وبعد داك سالنا بعض عن احوالنا، ما هو زميلي في النهاية..بقيتوني خالطاه؟!!
سبحان الله .. يعني الوش المركباه لي ده بس عشان وقفت مع زولها!
ياخ ما تخلي عندك ثقة بي نفسك..هو مش شايف الطرح دي كلها قدامه..وفي النهاية اختارك انت..بطلي غيرة واركزي شوية..ديل شنو ديل؟!!! لذا قررت ومراعاة لمشاعر صحباتي - لاني طيبة ومسكينة - وعشان ما اخسر البنات لانو كلهم عندهم الحركات دي,اني ما اقيف مع اي من ازوالهم"ما عارفة الجمع ده صح ولا لا"وكده شبه قطعت علاقتي مع اي ولد في دفعتنا مربط..
والله عشان اكون صريحة..ما قطعتها.....
بس قبال ما امشي عليه بتاكد انو ساحة المعركة خالية من الاعداء " الفتاة صاحبة الولد وصحباتها الفتانات"
(كمان آخر زمن دايرين يطلعوني خطافة رجال!!)
وكده قفلت علي الباب ده..
الموقف الثاني..
عندنا مشروع دايرين ننفذه في الكلية .. وكانت المجموعة القائمة على هذا العمل .. فيها انا ومعاي اولاد وبنات تانين، المهم بقينا شغالين مع بعض طالعين ونازلين سوا..
بعد فترة جاتني ليك وحدة من بعيد تتبسم..
-ازيك يا فلانة
-اهلين يامرحب
-كيف الاحوال؟اها ما في جديد" ما في جديد دي قالتا بعوجة خشم وانا الهبلة رديت عليها بكل سذاجة"
-والله الحمدلله..بس الموضوع ده ما مشى الزول المفروض يعمل الحاجة دي ما جه اتاخر
"طبعا رديت عليها في الموضوع الشغالة فيه"..
-لالأ..انا قصدي جديد بينك وبين فلان "فلان ده طلع واحد من الجماعة الشغالة معاهم"
-؟!!!!!! "نظرة بلهاء ارتسمت على وجهي"
-مالك مستغربة كده..ما شايفاكم اليوم كله مع بعض قلت احتمال..
-عايني يازولة ما في شئ بيناتنا..
واديتا ليكم تهزيئة كده ومشيت خليتا..
تاني يوم لقيت ليك الجماعة كلهم بدوروا فيني بفلان ده..ولمن اكورك واقول مافي شي ..يقولو لي يازولة انتي زعلانة مالك انت لاقية.!
يعني:1- لصقوا فيني زول بقونا علي قولهم جكس لذيذ
2- طلعوني زي كنت بشحد لي زول اجكسه،وفي النهاية لمن لقيت طلعت جاحدة للنعمة الانعم بيها ربنا علي!..
ما عافية ليكم .. حتى لو كان هزار..
الموقف الثالث..
يوم قاعدين بنات كتار بنتونس ونسة جميلة لا فيها قطيعة ولا شمار ... جاتنا ليك برلومة سلمت علينا.. لاحظت انو كلهم سلموا عليها مسيخ وبطرف يدينهم.. قلت ليهم:
-البت دي انا بحبها ظريفة و بشوشة وتعاملها حلو .. (ندموني على الكلام القلتو)
ردوا علي هايجين:
واحدة قالت: دي برلومة خفيفة وبالعة ليها حبة ظرافة
الثانية قالت: ياخ ما خالة فلان ولدنا في حالو.. مجل ما قاعد جارية وراه زي ضلو... ما تشوف ليها برلوم زيها!
التالتة قالت: انا زاتي ما عارفه فلان ده مكسر فيها ليه؟ كان ما شينة ودمها بقري وانا بكرهها..
-والله كان جينا للحق البت دي ولدنا هو الجاري وراها وهي بت مؤدبة وسمحة وما فيها كلمة...مالكم بتكرهوا من طرف..انتو براكم عشان ولدكم عايزها بتغيروا منها..
ردت علي وحدة:
آي ولدنا وبنغير عليه... احسن تختاه
-طيب انت فلان ده كاان حسع جاك بترضي بيه؟
بالحرف الواحد قالت "ابرا واستبرا مالك علي.. طبعا ما برضى بيه".
اها شوفوا جنس ده!
لا يرحموا... لا يخلوا رحمة ربنا تنزل!!!!!!!!!
الموقف الرابع..
لأسباب صحية وجسمانية و نفسية غبت لي كم يوم كده من الجامعة قلت ارتاح شوية..
جاتني وحده...
-ازيك، مالك غايبه ليك كم يوم...اكيد كاسرة
-والله تعبانة ،كسر شنو يااخ..انا قرايتي بطالة
-اهاااااا.. طيب الحاجة دي انا ما فاهماها ممكن تشرحيها لي؟
شرحت ليها الحاجة السالت منها
-والله قال عيانة!..ومال لو كنت كاسرة وقارية كان حيحصل شنو؟!
-(قل هو الله احد..ياحاسدة مالك علي) والله ده قريتو زمان..
ومضت في حالها.
جاتني وحدة تانية سالتني من حاجة اشرحها ليها...وانا ما كنت فاهماها، اتاسفت ليها وقالت لي مافي مشكلة وفرتكت..
الأيام التي تلت ذلك اليوم البت وصحباتها مساخة وبرود وكالعادة حدير...
ما اشتغلت بيهم، انا اصلا متعوده على الحاات دي..
بعد كم يوم اسمع لي كلام طاير..انو فلانة "اللي هي حضرتي" قاااارية جنس قراية وكاسرة في بيتهم..وغتيتة وما بتشرح الا لي ناسها!!
ووووب علي...والله ربنا يعلم لا قاعدة اقرا ولا غتيتة وما بشرح... ده كلو عشان شرحت لي وحدة وخليت التانية.
عشان الكلام ما يكتر...مخصوص مشيت وضغطت علي نفسي عشان اقرا الحاجات السالت منها المودموزيل الما جاوبتها .. وجيت بعد داك شرحت ليها وما خليتها لمن فهمت...
عارفين جزائي كان شنو؟
قالت لي:
طيب انتي لمن عارفة مالك ما شرحتي لي من المرة الأولى..ولا هرشتي...وضحكت ومشت!!
هرشت من شنو؟!
صاح هرشت من كلام الناس..
انا ما غبية ذاتي البشرح لزي امثالك اصحاب العقول المتعفنة.
الموقف الخامس..
كلو كوم..ولمن الأذية تجيك من ناس قريبين ليك وبتحبهم كوم تاني..
البت دي من اول يوم عرفتها..حبيتها-ولسه بعد العملتو لي ده بحبها من قلبي-اتشاركنا كتير من الحجات.. من القراية ونشاطات في الجامعة وونسة ومشاكل وهموم..وبقينا زي الأخوات.
جات امبارح استشارتني في موضوع.. وكانت بالجد مهمومة بيه وما عارفة تتخذ قرار...
شلت الهم معاها...وقعدنا ساعات بنتكلم ونفكر..عشان ناخد القرار الصح...
بعد داك اتفرقنا وقلنا لي بكرة..نكمل كلامنا...
اليوم جاتني بأفكار جديدة وكأنو في زول ملى ليها راسها...لمن حاولت اتكلم معاها...واذكرها بكلام امبارح...واقول ليها ماتستعجلي و....
ردت علي:"عايني..انتي امرقي منها بس!"
كلمتها وجعتني شديد...
في العادة برمي دميعاتي وابكي...
لكن للأسف زي دي ما بتستاهل ابكي عشانها..
إذا أنا بتجرح من اقرب الناس لي...ما مفروض الوم البقية...
باقي اليوم قضيتو زهجانة ومبتأسة...
لاقاني ولد كده...
طلب مني خدمة..عملتها ليهو
قام قال لي "يا..... انتي ما بتشبهي البنات"
طبعا فرحت وقلت ليهو شكراً ومشيت (لأني طبعا كنت شامة البنات في اللحظة ديك)..
لكن بعد شوية حسيت بإني – كيشة - ليه أنا افترضت انو الكلام ده تشكير...هو عارف شنو عن البنات غير انهم: سمحات ونظيفات وراقين ورايقين ولطيفات وأنا: جواطة وجوعارة وما في صفة من صفات البنات فيني....
ليست هناك تعليقات:
إرسال تعليق