دليل الإستعمال الشخصي لل ... قلب
Personal manual of heart usage
Chapter 3
التخبص مسؤولية ...!!
ياولد ويابت ... لما تقول أنا بحب فلان/فلانة ،،، إنتبه إنو الموضوع ده :
مشاعر نقية ، رعاية+حماية ، عدم خيانة وإخلاص ، وأخيراَ إجتهاد من أجل الزواج ..
طيب نمسكا من الكب ...(أحم احم) قصدي من المشاعر النقية :-
أنا قاصد بيها الأولاد أكتر (بس لانو بعرفهم أحسن ..) ,,, مرات في أولاد حبهم بيكون ماعفيف وطاهر 100% ودي مشكلة كبيــرة لأنو سلامة النية أهم حاجة ........... فالزول يصلح نيتو ، ومايدي الشيطان فرصة.
رعاية + حماية :-
حتي لو مافي زول طلب منك الحكاية دي ،،، لأنو لو إنت متخبص بالجد حتلقي نفسك بتعمل فيها ... وطبعاَ قصدي بيها الحماية من كل خطر (مادي - - ومعنوي) حتي لو كان الزول نفسو ..كيف ؟ مرات الزول بيكون عندو أفكار سيئة وفهم غلط ,,,, فمافائدة المحبة لو إنت ماصلحت الطرف الآخر وحميتو من شر نفسو !! وفرجت عنو مشاكلو وهمومو ...
يعني الزول المتخبص مابعامل بالمثل ,,,,,,, وفي أقصي حالات المحبة ،،، مابينتظر مقابل .. (ممكن ناس يسموها عباطه) هاهاها
الإخلاص وعدم الخيانة :-
دي بقا ..... مشكل كبير .... صديق إنتا ماصاح يخون حبيبك ...
:Ta’7abo9bedia.com تعريف مصطلح الخيانة من
1) لا تخلط :
ماتقول لي دي ونسة خفافية ،،،،، وماتقولي لي دي دردشة ساكت ...
الزول لما يكون بيعمل في حاجة غلط ..... بيكون عارف نفسو
2) الظرافة الزائدة عن الحد :
دي غالباَ بتحصل من البنات أكتر
هي هي هي ، وهاهاهاها ... وهاك ياونسة
ناس المسجات المما تقراها بتحس بكتمة نفس وقلبك بدق سريع ....
ناس مسكول تصبحي علي خير وصباح الخير ...
التوصيل للمواصلات كل يوم ,,,,
البت إحتمال تقول ... لي ... حلال عليكم حرام علينا ...
إنتو ماجاريين ورا البرلومات ,,, ومامخليين آداب وإقتصاد ...
أهههها .... في داعي ياشباب تدخلو أخوكم في الحته الضيقة دي .... أسي سكتتني ومابقدر أرد عليها ,,,
بالجد لو الناس عاوزة علاقات مسيتقرة وقليلة المشاكل (بدون مشاكل مافي طبعاَ) ...... تكون ملتزمة ومخلصة ،،، ومافي داعي للشفقة .... وأي زول بياخد قسمــــــــــــــــــتـــو .(-: )
إجتهاد وسعي من أجل الزواج :-
شايف الشباب كلهم صرو وشهم وجاريين لي نور طويل ...
والبنات .... إتبسمو وومنتظرين الضرب القاسي علي الشباب ,,, من الإيد البتوجعهم ..
طيب يافرد : أول حاجه :
قال الله تعالى : ( وَمَا مِن دَابَّةٍ فِي ٱلأرْضِ إِلاَّ عَلَى ٱللَّهِ رِزْقُهَا وَيَعْلَمُ مُسْتَقَرَّهَا وَمُسْتَوْدَعَهَا كُلٌّ فِى كِتَابٍ مُّبِينٍ) [هود:6]
تقسيم الأرزاق بين الناس، لا علاقة له، بالحسب ولا بالنسب، ولا بالعقل والذكاء، ولا بالوجاهة والمكانة ولا بالطاعة والعصيان، وإنما يوزع جل جلاله رزقه على عباده، لحكمة هو يعلمها ...
في ناس طبعاَ أول ماشافو الكلام ده ,,,,طوالي ,,,, ياخ عارفيين ياخ ,,,,
لا لا ماعارفيين ,,,لو عارفيين بالجد ماكان كلكم حافظين الأسطوانة بتاعت ( الواحد لما يتخرج ، والخدمة الوطنية ، وعشان تلقي شغل ، والواسطة ، وتكون نفسك ، والصالة ، والفنان ، والمهر ، والعشاء ، وده كلو هين حأصرف عليها يومياَ من وين ) ودي منو البتنتظرك في الزمن ده ...
كلام منطقي جداَ _ومحبط جداَجداَ _
بس الحمدلله ,,, إنو الرزق مابالمنطق ,,,ماتفهموني غلط ... الزول مايقعد ساي ويقول الرزق مابالمنطق بس كمان يكفي إنك تتوكل علي الله وتجتهد وربنا بسهلها إن شاء الله ( بس حكاية النية ماتنسوها ----- مهمة جداَ في التوفيق )
أما دي منو البتنتظرك دي !! فإنت الغلطان لو إتورطت مع واحدة هاي كلاس ، وإستايل ,,, ومابتقدر الظروف ,, وإنتا ماعندك قدرة ليها
تاني حاجة ياشباب :
ماتخليك تقليدي - - - - - ونمطي فكر ... شغل مخك ... (طايوقك زي مابيقول الأستاذ)
فكر في أي حاجة تقدر تشتغلها ...وماتقعد ساي ... لأنو - - - - - في الحركـــــة بركـــــــة .
وفي الآخر لو ماأقنعك كلامي ده وحسيت إنو ده كلام زول متفائل ساي ,,,, وبيحلم ,,,, وحسيت إنو ظروفك وكده (طبعاَ أنا مقدر إنو الناس ظروفا ماكلها واحده وبالجد في ناس ممكن تكون عندهم مشاكل - - - ربنا يساعدهم إن شاء الله )
فحأقول ليك قال صلي الله عليه وسلم : (( رحم الله رجلاَ عرف قدر نفسه )) أو كما قال ،،، بس في الحالة دي ماتربط ساي وتجيب لي نفسك ولي غيرك مشاكل ،،، خليك بعيد لما تتحسن الظروف .
أما البنات :
فأنا حأأخر الكلام معاكم في النقطة دي (نسبة لي ظروف كده ) ------- إلي وقت لاحق إن شاء الله ,,,
وأخيراَ - - - حأختم بمقولة برددها واحد صاحبنا في هندسة :
العندو محبة ماخلا الحبة والماعندو محبة ماعندو الحبة
(المحبة هنا = ليست التخبص فقط بل المحبة بشكل عام )
مش كده ,,,, أنا زاتي ماكنت عارف إنو ناس هندسة عندهم مشاعروأحاسيس ,,,,
AnyMouse
ليست هناك تعليقات:
إرسال تعليق