الرابطة
عارفين الكلمة دي معناها شنو
أنا في قاموسي الشخصي ... رابطة تعني إعتصام
أوريكم ليه ؟؟
في أول يوم في إمتحانات الفصل الثاني ونحن في سنة أولي - - - إمتحان متجهات لدكتور أوكير
وأنا داخلة الجامعة ... لقيت الناس جايطة
قالوا في إعتصام
إعتصام = ماأمتحن لي د.أوكير
" يافرد إعتصموا براكم ... أنا خاشة أمتحن, لكن صحي ...إنتو مالكم دايرين تعتصموا ؟؟ "
قالوا : " في طلبة معانا مادفعوا الرسوم الدراسية وبالتالي حيحرموا من الجلوس للإمتحان ...
والله قضية نبيلة ...
لكن أنا برضوا ماشة أمتحن ..
ياجماعة ماتفهموني غلط دي ماأنانية مني ... كنت برلومة مافاهمة حاجة ، ومتجرسة من الإمتحان ... ده دكتور أوكير .. مابقدر أعمل حركة زي دي في إمتحانه ...
عشان أدخل الإمتحان ، لقيت ليك أولاد الكلية محاوطين القاعة ، وقالوا أي زول حيخش حيدقو يعني .. Exam Holeمشيت علي
يا أدقه ,,,, يا ما أمتحن ...
المهم ... الإعتصام إستمر ومادخلنا الإمتحان ،
طبعاَ إتحمقت وبقيت داقة جرس وبسأل ، مين المسؤول عن الحركة الجعانة دي ؟؟
الإجابة كانت ناس الرابطة ...
من اليوم داك أنا بشم الرابطة وناس الرابطة ..
مرت السنوات وأنا لسه بشم الرابطة ،، إسمها ساي بيرفع لي كثافتي
لمــــــــــــــــــــــن ...... وصلت سنة رابعة .
ظهرت الرحلة العلمية ... وأنا من اللجنة المنظمة للرحلة ,,, ماتتخيلوا تعبنا قدر شنو ، عشان بس خطابات دعم الرحلة تطلع ...روحنا مرقت
جرجرة وتعب .....
مافي دعومات ....
العميد مستاء وقال نحن لجنة فاشلة ....
فجأة انتبهت ....
انتو وين الرابطة ؟؟؟ مش مفروض تساعدنا ولابس تفلح تعتصم لينا ؟؟!!
وإكتشفت إنه خلال السنتين الفاتو ... ماكان عندنا رابطة ...
(بلاهي .... وأنا أقول الكلية مالها هادية مافيها إعتصامات )
ظهر موضوع اسبوع نصرة الرسول عليه الصلاة والسلام
وطبعا كنا دايرين ساوند عشان الإذاعة والشيوخ و المداحين
قالوا امشوا العمادة جيبو تصديق
مشينا العمادة…
ناس العمادة شاكلونا وهزءونا وهددونا بالفصل لو لقو ساوند مدقوق في الكلية
" اشمعنا نحن ما ندق ساوند؟؟ ناس هندسة ديل كل يوم سبب بلا سبب ساونم مدقوق وحفلتم مدورة ؟؟؟؟؟؟؟؟"
عارفين الرد على رديحي ده كان شنو؟؟
لأنهم عندهم رابطة
(إحم إحم والله الرابطه طلع عندها منافع)
بعد شويه ظهر موضوع دوري الجامعه لكرة القدم
فريقنا كحيان....
ما عندو زول بيرعاهو....
مافي قروش للمدرب وإيجار الملعب....
وقامت على الهاشميه
وبديت أجمع شير من الطلبة عشان المنتخب يمشي أموروا
ما تتخيلو الزله والكلام الفارغ السمعتو....
والطلبه محتجين وبكوركو "ياخ المنتخب قد جيبنا"
وللمرة اللألف.... ....
لو كان في رابطة ماكان جيوب الطلبة إتقدت
وما كان كرامتي مسحوا بيها الأرض ....
دايرين رااااااااااااااااااابطة
يا جماعه ده الشعار المفروض يرفعوا أي طالب في إسكوول .. صاح هم عملوا حركه ما حلوة وخلوني أجي امتحن شهر8 وضيعوا علي إجازتي....لكن الكانوا حيقدموه لي كان حيخليني أعفي ليهم…
أنا بعتذر لكل الناس الكانو في الرابطة القديمة لأنو ما كنت فاهمة صاح ..
وبشكر الشباب الجروا في موضوع إعادة الرابطة في الكلية وبقول ليهم ما قصرتو ....الدور الباقي علينا
الآن المطلوب مننا نحن الطلبه شنو؟؟؟
أولاً:
الناس كلها تتوحد وتبطل تعمل حركات وطعين في بعض ....
"أنا ما بدخل في القائمه دي لأنهم كيزان"
"ما بنزل مع ديل لأنهم كفار"
"وياخ الزول الماسك القائمة دي مابحبو"
يا جماعة نحن كلنا طلبة كلية واحده ....وكلنا إسكوليين ... يعني شنو قائمة كيزان ولاتحالف ولا.... اذا ناس قلبهم على الكلية وحيخدموها
ثانياَ:
يا طلاب ويا طالبات
لم تقام الإنتخابات صوتواااااا
عشان النصاب يكتمل ....
ولو النصاب ما إكتمل ما حتقوم الرابطة
ولو ما قامت رابطة اسه.... تاني ماحتقوم ....
نحن فضل لينا سنه ونتخرج ونغادر الكليه .. يعني ما حنضرر كتير لو ما قامت....
لكن المشكلة يا القاعدين لسع.... ....
صدقوني حتتعبوا …
وما حتفهموا إنكم محتاجين لرابطة إلا لمن تواجهكم مشاكل و ما تقدروا تحلوه
أنا ما كنت عارفه أهمية الرابطة – لكن الحمدلله عرفت (و إن كان متأخر)
أتمنى إنكم تحسوا بي أهميتها من بدري.... ...
أمنية بشير
ليست هناك تعليقات:
إرسال تعليق