Prison Break
Season one
"داير أهج من البلد دي .."
"السودان ده ماحيمشي لقدام .."
"متين أتخرج عشان أسافر و أغترب ..."
عبارات برددوها الشباب،كلها بتدل علي حاجة واحدة الأستياء من الوضع الحالي للسودان وعدم قدرتهم على مواصلة حياتهم فيه.
الأسباب كتيرة الخلت مفهوم الهجرة و الخروج من البلد تسيطر على تفكيرهم،صــاح السودان تعبان و العيشة صعبة .. ما في شغل .. الخريجين عاطلين .. الواسطة خاربة البلد ..المرتبات بسيطة .. وغيرها كتيـــــــــر ..
لكن رغم الحاصل هل بتفتكروا انو سفركم و طلوعكم لبلد تاني حل؟ حتقولوا لي:ِ "الوضع ما مستحمل .. حقنا ضايع .. والبلد دي أصلها ما حتيتغير"
هي تتغير و تمشي لقدام كيف لو انتو شبابنا مرقتوا و هجيتوا ؟؟!!!!
منو الحيغير .. منو الحيصلح ..
عارفة ردكم على كلامي ده " مافي فرصة للتغير، وانا براي ما حأعمل حاجة،وهي الحكومة مديانا فرصة .. الخ"
يا شباب .. كل كلامكم صاح .. لكن عمره ما كان الاغتراب و ترك البلد حل للمشاكل دي .. بالعكس ده اسمه هروب .. هروب من واقع مرير ملئ بالمشاكل..
السودان ده البلد الولدونا و الاتربينا فيه .. شئنا ام أبينا ده بلدنا ..
أبوك .. أمك .. أخوانك .. أهلك ..أحبابك .. ذكرياتك .. ده كلو تجدعوا وراك وتهاجر؟؟!!!!!!!!!!!!!
في نوع بقول اهلي بسفرهم معاي ... ونوع تاني بقول أنا بمشي ألملم لي قريشات و أجي راجع ..
أنت الضمنك شنو انو تلقى ليك وظيفة كويسة بمرتب كويس .. وحتلم قروشك دي في كم سنة 1 ..2..5..10 .. عشان لم تجي راجع تلقى أهلك انقرضوا .. وقتها القروش ما حتنفعك و حتندم على اليوم الودعتهم فيه و مشيت ..
أنا ما دايرة أبقى ليكم وطنية، و أرفع ليكم شِعارات البلد محتاجة ليكم ولازم تصلحوا و تغيروا وكلام من هذا القبيل،ما تصلح ولا حاجة .. فكر في روحك بس .. غيير عشان انت تصل للدايره،انا شايفة في فرص شغل .. ياما غيرك اشتغلوا و عايشين مرفهيين،لا سافروا لا اتخارجوا .. حتقول لي ديل ناس القطاع الخاص ما موظفين الحكومة .. ودي الواسطة ....
حأقول ليك أســـــــــــــــعى .. ربنا قال أسعوا .. ورزقك الكاتبه ليك ربنا ياهو زاتو سواء اشتغلت في السودان ولا السعودية ولا ايطاليا ولا ماليزيا .. والداير يستمتع بحياته و يرفه ممكن يرفه في اي مكان ..
خلي ثقتك برب العالمين كبيرة .. وخليك قنوع بالكاتبه ليك الله ومافي داعي تمشي بلدا ما بلدك وتعمل لي اهلها ضيق نفس ..
ويا البتقولوا مسافرين و ما فارق معاهم السودان .. أنا و أنتو و الزمن طويل ..
بضرب ليكم التلفونات .. وحنشوف منو الحيجــرس ويقول كفاي انا راجع ..
عارفة الاسباب للسفر برة أكتر و أقوي من كدة ..
لكن الحلول موجودة داخل بلدنا .. وأكيد حنتتناقش سوا عشان نصل ليها ..
بس تعالوا نتفق في الأول ..
ما في داعي للهج ...
أمنية بشير
ليست هناك تعليقات:
إرسال تعليق