البرالــمة
نرحب بالدفعة الجديدة .
أي دفعة تدخل الجامعة تكون مصنفة إلي 5 فئات أي أن أي طالب لابد أن ينتمي إلى نوع أو أكثر من هذه التصنيفات
*البرالمة الموهومين (السياسيين) :
أي برلوم من النوع دا بكون واهم نفسو بإنو بفهم أكتر من الباقين و مثقف و مطلع وخايف على البلد و جنو و جن الحكومة و ليه العيش يزيدو وببكي على جامعة الخرطوم زمان !!!
*النوع الثاني ديل الشفاتة ، ديل عاملين فيها فاهمينها صاح و مستفيدين من الزمن بتاعم اليوم كلو خالطين من هناية لي هناية .
*و في نوع العلماء و ديل نظامم واحد المحاضرة المكتبة البيت ، شايفين باقي الحاجات دي كلها كلام فاضي ، يعني شنو سياسة يعني شنو زول ما سجل أعمل ليو شنو . يعني شنو خلطا هناية أستفيد شنو ؟
ياخي ديل الكورة ما بمشو يشجعو !!
*أما النوع الرابع ديل الشباب الراسطات و العايشين عشان برامج الشباب : كورة – كتشينة – جبنة وشاي – تدوير في بعض .
وطبعا ديل في نظر النوع الأول – السياسيين – مابقو معاهم لأنهم ماقروا كتير و ما مثقفين و لا بخافو على البلد و ما بهمهم لو العيش زاد و لا مازاد . و في نظر الحبيبين ماعندهم حنك يعني حنكم بييييش . أما في وجهة نظر العلماء بلدا و أغبياء .
*أما النوع الخامس فدا النوع المهم عارفين ديل منو ؟ ديل لافتين الأنظار أو لاأصح العندهم مرض حب الظهور و أي بلوم من ديل إحتمال كبير يجي داخل الكلية أول يوم و إحتمال ليه أنا متأكد إنو بجي لابس فنيلة صفراء( لو داير تظهر ألبس أصفر ) ، طبعا النوع دا عجيب جدا أول إسبوع تلقاهو خاشي في البنات لفت بضحك مع دي و بلعب مع ديك بعد 3 يوم تلقاهو ما بصافح ما تعرفو مالو مد يدو لي بت قالت ليهو مابصافح ، الله هداو ، الله أعلم الحصل ليهو شنو !!!!!!!
في الإحتفال بتاع إستقبال البرالمة تلقاهو بغني كأنو أحمد الصادق و بعد شهر في دوري المستويات عامل فيها كاكا وفي نفس الوقت تلقاهو بشرب سجاير وبشرح للبنات وبحارب الفساد وهو كوز وبكره الحكومة وكمان امبريالي توسعي رأسمالي من أنصار ماركس . ياربي في ناس كده ,الله أعلم !!!!!!
ومن المؤكد إنو أي واحد من الفئات دي شايف نفسو هو الصاح والباقين ديل فارات ساي .
ياخي بدل دا كلو إنت ما تكون طالب عادي تنتمي إلى حزب معين أو لاتنتمي حسب قناعاتك الشخصية و في نفس الوقت تشوف ليك برلومة ولا إثنين ظراف كدا ، ودا كلو ما يمنعك من إنو تكون متفوق أكاديميا و تمارس موهبتك لو كانت كورة ولا غناء بس على شرط تكون موهوب ما شلاقة ساكت .
وفي النهاية أقول ليكم إتو مافي زول بتخرج و معاهو حاجة من ديل غير الشهادة و الفهم أي أن الهدف الأساسي من الجامعة هو الفهم و بس ......
مع تمنياتي لكم بالتوفيق .
عبد الحميد آدم
ليست هناك تعليقات:
إرسال تعليق