واسألوا ........... !
- مرحباً بكم في برنامج ضيف على الهواء وضيفنا اليوم شخصية من نوع خاص .........لقائنا اليوم مع النجم الصاعد كالصاروخ النجم الضجة صاحب اعلي نسبة مشاهدة في برامجه التليفزيونية لقائنا اليوم مع الشيخ الشيخ .............موسيقى تشويقية .......عمورى
مرحب بيك يا شيخ عمورى ونحن بنرحب بيك في برنامجنا ضيف على الهواء .
- السلام عليكم ورحمة الله وبركاته وأنا جاهز إنشاء الله وبحمده لأسئلة السادة المشاهدين .
- طيب يا شيخ عمورى نبداء برنامجنا ونفتح الفرصة للسادة المشاهدين للمشاركة معانا في البرنامج ونستقبل تلفون ....
- الو ..السلام عليكم .
- وعليكم السلام اتفضل .
- لو سمحت يا شيخ عندي سؤال وكدا ..... يا شيخنا ناس أمريكا و إسرائيل ديل مش كفار وقليلين أدب وكدا ....... وانحنا الناس المسلمين والكويسين .
- أكيد يا آخى ودى ما فيها اى شك .
- طيب الناس ديل متقدمين فى العلم و في اى حاجة في الدنيا .... اقتصاد وعلوم وكلو الكلام دا ما واضح لى يا شيخنا الناس الكعبين أحسن من الناس الكويسين ........ وشكراً.
- بسم الله والحمد لله أولا قبل ما أرد على ولدنا داير أقول ليهو انو الناس ديل ما فايتننا ولا حاجة لأنو نحن مؤمنين وهم لا ...... وهم في النار وانحنا في الجنة .......دى نقطة سبتا وبعدين يا آخى دا نوع من الابتلاء لأنو نحن بعدنا عن ربنا وانشغلنا بتعلم علوم الكفار وهم ما بدونا العلم المفيد وكدا ..... و بعدين من جانب تانى العلم والتقدم الفيهو الغرب دا كلو حقنا شالو مننا زمان وكدا ........ وبعدين الله سخر لينا الغرب عشان ما نتعب في علوم الدنيا وكل ما علينا هو الاجتهاد في العلوم الدينية من فقه وعقائد و غيرو ونترك العلوم الدنيوية للكفار ...وهم يتعبوا ويخترعوا ونحن نلقاها جاهزة وفى النهاية هم في النار .... وأرجو انو أكون جاوبت ليك .
- الو .... الو .
- أهلا بيك في برنامجنا اتفضل .
- معليش بس ممكن أتكلم مع الزول القاعد دا .
- جداً اتفضل .
- أول حاجة داير اسئلك سؤال انت حالق دقنك ومتمسح كدا لية يعنى ما فيك اى وقار ... وبعدين انت من البرامج التلفزيونية بتقبض اكتر من 2 مليون دولار في السنة انت شيخ ولا بتلعب في ريال مدريد........ وطيب قاعد تدى منها للمساكين كم وأنت سايق ليك عربية اخر موديل وبعدين .....شششششششششش
- معليش انقطع الخط ..... وبعدين يا جماعة اى زول عندو مشكلة شخصية مع الشيخ دا ما وكتو وأرجو الناس تكون موضوعية في طرح الأسئلة .
- الو ... الو
- أهلا وسهلا اتفضل انت معانا على الهواء.
- شكرا ليكم لاتاحة الفرصة وداير أهدى الفتوة الجاية للرئيس وكل الشعب السوداني والأهل في ام كريعات و ..
- اتفضل أسئل سؤالك .
- داير أسئل من حديث الضبانة .. واكان وقعت فى الروب اسويلا شنو وداير اعرف حكم الضب زى الضبانة ولا لا و عندى سؤال تانى .....ششششش
- طيب يا مولانا الخط قطع ونكتفى بالسؤال الاول وخلاص .
- اول حاجة الزول دا شكلو بسال من حديث الذبابة ودا حديث ثابت طبعا فى السنة ..... واكان وقعت الضبانة فى الروب دخلا كلها وبعدين اشرب الروب عادى لانو فيها الدواء بتاعا ...... أما عن حكم الضب فانه لم يرد أن الضب وقع في طعام احد من الصحابة والله ورسوله اعلم .
- طيب شكرا ليك ومن هنا أنا عندي اقتراح انو الناس ممكن تستفيد من الحديث دا ولا ما كدا يا شيخنا .
- ايوة ممكن نستفيد منو ونعمل مصنع اسلامى للادوية وبى كدا نستفيد من كمية الضبان الموجود في السودان .... ومن هذا المنبر انى أدعو الغرب الكافر لفتح حماماته .....اقصد معاملة لهذا الاكتشاف العظيم .
- طيب يا شيخنا نشوف فاصل وبعدين نرجع ليك .
........فاصل موسيقى .......
هل لديك الكثير من الأسئلة ...... هل تعانى من الحيرة ...... هل برامج التلفزيون والراديو لا ترضى طموحاتك .... هل تعانى من فاتورة التلفون المكلفة ..... إليكم الحل ........موسيقى تشويقية ...... المفتى الألى هو الحل ... خفيف الوزن ......سهل الاستعمال ....... قابل للبرمجة..... والابديت مجاناً ....وقريبا جداً المفتى موبايل .... كل هذا من شركة ( و اسألوا أهل الذكر إن كنتم لا تعلمون ) ....شعارنا لاتحتار ...المفتى هو الخيار .
- طيب نستقبل المكالمات .
- الو .... السلام عليكم ... ياخ داير أسئل حكم الدين شنو في مسألة اوكامبو مع البشير وحكم الزول البقيف مع اوكامبو .
احمر وجه الشيخ وتعرقت يداه...الزول دا داير يودينا السجن ولا شنو
- يا شيخنا ........... عمل فيها ما سامع ........أعيد السؤال ولا شنو .
- لا شكراً ..... طبعاً يا جماعة البشير هو الإمام بتاعنا وهو رمز الأمة الإسلامية وحافظ كتير من القران غير كدا ......اوكامبو دا حافظ سورة واحدة ؟ ..... وبعدين البشير زول راجل ....... عشان كدا راى الدين انو اى يزول يرضى بى قرار اوكامبو ....أثم شرعاً ..........مش كدا وبس بل يجب عليهو أن يسعى لتغيره بيده فان لم يستطع فبلسانه فان لم يستطع فبقلبه وذلك اضعف الإيمان .
- الو السلام عليكم ......... ياشيخنا والله عندى ولدى امتحن شهادة سودانية وجاب 84 وداير اشوف راي الدين شنو بخصوص التقديم وكدا ..... والحاجة التانية داير اعرف لمن اكون ماشة فى الشارع امشى يمين الزلط ولا شمال الظلط ولا فى النص وشكراً.
- طيب اولا بخصوص الولد بما انو ذكى فيجب عليه تعلم علم شرعى ويا حبذا لو فى جامعة غير مختلطة لانو النساء ديل فتنة كبيرة يجب تجنبم ما امكن ...... والحاجة التانية فى موضوع المشى انا شايف انو تانى النساء يمشو شمال الشارع والرجال يمين الشارع وبذلك نكون درءنا الفتنة البتحصل فى الشوارع وخاصة ايام العيد .
- الو ...الو ... نيتقبل مكالمة جديدة .
- عاين يا مولانا نحن فى القرن العشرين .... يعنى زمن بتاع تخصصات وبعدين انت هسى اتكلمت فى الاحياء والسياسة و الدين واى حاجة بسألوك ليها بتجاوب والله ماعرفناك شيخ ولا شغال فى الشؤون العلمية ولابتاع مرور حكايتك شنو انت يا شيخنا شغال نجر ...نجر....نجر....كرهتونا التلفزيون زاتو الزول داير يسمع ليهو غنية ساى ما لاقى طريقة ....ششششششششششششششش
- معليش انقطع الخط وناسف للناس الماقدرو يتصلوا علينا لأنو زمن البرنامج انتهاء والى لقاء في الحلقة القادمة وشكراً .
Nubian Boy
ليست هناك تعليقات:
إرسال تعليق