موضوع (2) - - - - الكاتب : أمنية بشير

---

ماليزيا ال time square

.. الساعة 10 مساء

تعبانة و قاعدة في الأرض منتظرين البص عشان نرجع الشقق.. عمك سواق البص شرانا و بالتالي حنضطر نرجع بالتكاسي، كنا 4 اولاد و 23 فتاة .. وطبعا في نوع البنات – الله يطراهم بالخير- المابركب تكاسي إلا معاهو ولد، حنك البلد ده ما امن؛ لذلك فكرت انو نحن البنات الغبشات و الما بخافوا يخطفهم بتاع التاكسي نركب من غير أولاد ..

و أنا قاعدة في أرض الله بفكر في الموضوع ده، جاني واحد من أولادنا قال لي : يا أمنية في تكسي حيتحرك و لأنك أنت تعبانة قومي أرح معانا ..

رديت: لا ما بمشي شوف واحدة غيري

- يابت قولت ليك قوم أرح

طوالي دقيت ليه جرس و بقيت أكورك و قلت ليه ما بتحرك إلا كل البنات يتحركوا ..

طبعا صاحبنا حنبك و مشى...

رجعنا الشقق، وقلت أمشي أرضيه عشان ما يزعل و أفهمه لي أنا أبيت أمشي معاهو .. اول ما شفته لقيتو ليك كاضم و مركب وش، بديت أتكلم معاه جااااط و قال ما داير يسمعني .. أستغربت و ما فهمت ما الجرم الذي أرتكبته عشان هو يزعل قدر ده.

سألت بقيت الشباب فلان ده زعلان لي، قالوا:

- أنتي كسرتي كلمته

- يعني كيف ما تمشي لمن كل البنات يمشوا .. هو ما عاجبك، إنت أرجل منو

- دايرة تفرضي رايك

أيوااااااااااااااااااااااااااااااااا ... بلاهي الموضوع دخل فيهو رجولة و أنوثة؟؟؟؟؟؟؟؟!!!!!!!!!!!!!!!!!!

المهم بجاي بيجاي و بدخول الأجاويد .. اتصالحنا و انتهى الموضوع على خييير...

الطائرة راجعين سودان الهنا

قاعدة جنب صاحبنا داك زاتو ..

تخيلوا قال شنو :

-"النسوان" دايما بحاولوا يفرضوا رايهم .. و بحاولوا يتسلطوا، و بيبحثوا عن الشهرة .. فلانه ديك مهندسة و فلانة ديك رائد مرور، وأي واحده تمسك ليها سلطة لازم تعكسها على الناس بلئامتها

( طبعا في اللحظة ديك عرفت رايه فيني شنو ..)

تم كلامه و قال:

المرأة مكانها المنزل ، بس تقعد في البيت ترجى راجلها لمن يجي من الشغل تخدمه و تخدم عياله..

- ووب علينا ده كلام شنو؟؟

- أي .. انتو متخيليين ده تفكير زول رجعي لكن ده التفكير السليم

- طيب .. اذا الواحدة عندها طاقة و بتقدر توفق بين شغلها و بيتها، المشكلة وين؟

- هي ماشة تشتغل بره لي؟

- عشان تساعد..

- لأ هي بتشتغل عشان تثبت لي نفسها و للحولينا انو انا "مرأة" و بعمل المابقدر راجل يعملو..

- بعدين أنا زاتى ما بعرس لى وحده فاهمة و متعلمة عشان تقعد تغالطنى فى أى صغيرة و كبيرة أنا داير لى واحده اقول ليها أمشى يمين تمشى يمين أمشى شمال تمشى شمال.

- البنات ما بقرو من أجل العلم بقرو من أجل الشهرة...هسع فى داعى الوحده تمشى تقرا هندسة ميكانيكا دى شغلانة بنات؟

"نرجو من الجميع ربط الأحزمه..."

أنهى نقاشنا صوت المضيفة و بهذا انتهى نقاشنا و اى زول رجع مقعده

و بوصلنا السودان..

تفتكروا الأولاد كلهم بفكروا كده؟!!

أنا أظن إنو دا تفكير الغالبيه العظمى لكن السؤال :

أولاً : هل نحن صحى متسلطات؟!!

أنا معاهو فى إنو المرا لمن تمسك ليها سلطه بتبقى فقريه.. لكن عارفين لى؟!!

عشان يادوب تقدر تمشى رايها لانو المجتمع بينظر ليها على إنها مراة و بحقروا بيها.

يعنى مضطرين يدوكم وشهم التانى..

ثانياً : ما ممكن الوحده فينا تقرا ليها 5 أو 6 سنين و ما تستفيد من القرتو دا...

كدى لو إتبادلنا الأدوار.. و الأولاد قرروا يقعدوا فى البيوت و البنات المرقو للشغل ..

ما حتزهو من أكنس,أمسح,أطبخ,العيال,....الخ

و مقابلة ألابع حيطان برنامج مليان و ماهين لكن روتين ممل

و الله اسبوع واحد و حنلقاكم كلكم فى التجانى الماحى و ممكن ناخده من منظور تانى "كل ممنوع مرغوب"

"البنات ما حيعجبوم كلامى دا.."

عشان الناس داقا جرس فى شغل البنات و قرايتم هم الدايرين يقرو و يشتغلو..

يعنى هسع لو كان الامر عادى .. كانو قالو دايرين يقعد وفى البيت و الشغل دا للرجال بس.

عموماً يا زول يا راقى..

الحياة مشاركة بينك و بين زوجتك و بين الأولاد الحيجو فى السكه..

اى واحد فيكم عندو دور عشان الحياة تستمر لكن الدور دا ما ثابت..

يعنى ما الراجل دايمن البجيب القروش ..

و النسوان بطبخو و يربو العيال..

و العيال يلهفو فى قروش ابوهم..

ممكن الناس تتساعد مع بعض عشان الحياة تمشى و جميع الأطراف تكون راضيه..

و إن شاء الله يا أخ تقع ليك فى وحده ..تمسك من ايدك البتوجعك..و هى تبقى سايقاك يمين و شمال..

وقتها.. الضحك حيشرطنى فيك..

Omnia Basheer