وجهة نظر - - الكاتب : أمنية و نيروز

وجـهـة نـظر

قاعده يوم براي بتأمل في خلق الله .. فجأة جاتني صحبتي (ش.م) طايرة الوش مكرفس و شكلها متضايقه شديد .. أول ما قعدت قالت :

- اوووف ..

- مالك خير ..

- كلو من الزفت ده ..

- الزفت منو ؟

- يعني حيكون منو غيرو .. هم في غيرهم بفقرو على الزول يومو ما فلان..

(فلان ده جكسيها).

- أأأه ..امبارح ماكنتو حلوين وأخر ابتسامات والحبكانات الجدّ شنو .؟

- ياخ ده ولد عينو زايغه .. أنا واقفه قدامه وهو بكابس في البرلومات ..

ما ماليه عينو أنا .. لي بعمل معاي كده .؟؟

- يازولا ولا يهمك انت عارفة الجنس الأخر ده عواليق ..

- (وكأنو كلمتي وقفت ليها في جرح) صااااح .

- بعد شوية جاتني صحبتا (ع.ن) ..

(ع.ن) وااااي انا ..

أنا : اها مالك انت كمان ؟؟؟

(ع.ن) : انا فلان ده حيوقف قلبي من هنا و مركز القلب طوالي ..

(طبعا عرفتو مصطلح فلان) .

(ش.م) : ما قلت ليك مافي غيرهم بزهجنا ويقرفنا ..

انا : كدي أحكي حصل شنو ؟؟

(ع.ن) : انا من الصباح زهجانة وقافلة معاي .. قعدت حبة قلت أفضفض ليه .. اكتشفت بعد نص ساعة من الحديث انو ما كان سامع أنا بقول في شنو ..

(ش.م) : الاولاد ديل ما عندهم مشاعر ولا أحاسيس اشك انهم بشر زيّنا ..

(ع.ن) : أحيييي لكن ما بنقدر نعيش من غيرهم

انا : طيب استحملو ..

(ع.ن) و(ش.م) : بنستحمل .

بعد يومين :

(ش.م) : شفت يا ... المقال المكتوب في جريدة طلعت ..

انا : ياتو واحد .؟!

(ع.ن) : ياخ واحد قايل روحو ظريف قال البنات كائنات فضائية , ما عارفة كان نحن كائنات فضائية هم يكونو شنو ..؟

(ش.م) : من عائلة " فلنستون ,ناس العصر الحجري "

انا : لالالا .. اقزام منزلية ..

(ع.ن) : و كمان اخر ما اتوصلو لي قرروا يتخلصو مننا و يرسلونا بمكوك فضائي للشمس ..

انا : ها ها ها ها هاااااا ( طبعا لقيتم بحدرو لي قطعت ضحكتي طوالي )

(ش.م) : وكمان معانا مهند ..

انا : مهند منو ؟؟

(ع.ن) : مهند شاد أوغلو ..

أنا : النبي .. سايقنو معانا الشمس .. هو تبع المخلوقات الفضائية ؟؟!

(ش.م) : طبعا غايرانين منو لانو البنات كلهم مكسرين فيه ..

(ع.ن) : الله يديني راجل زي مهند ..

(ش.م) : جمعا يااااارب ..

(و غرقت كل وحدة في احلامها الخاصة بمهند حقها ) ..

مهند شخصية اسرت قلوب البنات , واشعلت نار الغيرة عند الشباب والسؤال اشمعنا مهند لا احمد عز ولا برادبت ؟؟؟؟!!

الحكاية يا جماعة مافي الخلقة الموضوع اخلاق ..

مهند ده بقدس مرتو .. ومغرقة في العسل .. فارش ليها الارض ورود ..

ما برضا زعلها .. ما شايف في الدنيا غيرها .. رومانسي .. حنون .. جنتل .. راقي ومحسسها انها اميرة مملكته .............الخ (وده كلو ما بمنع انو يكون عندو عيوب "شخصية طبيعية") .

اما البنات بطبيعتهم عاطفيات .. والمشاعر بتشكل جزء كبير جدا في حياتهم .. بس الاولاد مافاهمين الكلام , أو غالبا ما مستوعبنو .. ولو داير تكسب ست الناس لازم تعرف كيف تتعامل معاها .. تحترم مشاعرها و احاسيسها .. حتى لو كانت الحاجة دي في نظرك ما مهمة ..

الفكرة تتعامل معاها كأنثي ,تركيبة مختلفة عنك .. مش واحد صحبك ؟؟ شاركها احاسيسها و حاول تلبي طلباتها "الي هي غالبا معنوية " صدقني ما بتكلفك كتيير ..ويعني لو داير تنال رضا الجميل أبقى زي مهند .

اما البنات بتمنى انها تستوعب الحبيب و ما تضغط علي وتتفهم تركيبتووتعرف كيف تتعامل معاهو (وما تقصري لو دايره مهند ابقي نور) ..

NyRoZ & OmNiA